ကဗျာ

တာဝန်ပေးတဲ့သမိုင်းများ

ပဉ္စလက်ရာသီမှာ
မုတ်သုံသစ်တောတွေက
စိမ်းလန်းခြင်းကို လုယက်ခံထားရသတဲ့။

ကျေးဇူးပဲ အယ်လ်ဂိုး*ရေ…
အကျိုးစီးပွားနဲ့ အပေးအယူလုပ်တဲ့ခေတ်မှာ
ကမ္ဘာကြီးက ပူနွေးလာသလောက်
အတ္တတွေက အေးခဲသွားကြတယ်။
အမှန်တရားက ခါးသက်သလောက်
မုသားက ချိုမြိန်တယ်။
မျက်လုံးတွေက ပိုစိမ်းလာသလောက်
တော်လှန်ရေးက အပေါစားဆန်လာတယ်။

ဒါ…ကျနော်တို့ထုဆစ်တဲ့
ကမ္ဘာသစ်ရဲ့ ပုံရိပ်စစ်တွေလား။

နေလုံးထမ်းထားတဲ့ခေတ်ကြီးကို
အလျားလိုက်ဖြတ်ကူးဖို့
ကျနော်တို့ရဲ့ပုခုံးပေါ်ကို
သမိုင်းက တာဝန်တွေပစ်တင်ပေးလိုက်တယ်။ ။

ရဲသွေး

အယ်လ်ဂိုး* အမေရိကန် ဒုတိယသမ္မတဟောင်း၊ သဘာဝပတ်ဝန်းကျင် ထိန်းသိမ်းစောင့်ရှောက်ရေး ကျွမ်းကျင်ပညာရှင်